თეა წულუკიანი დელეგაციასთან ერთად სისხლის სამართლის საერთაშორისო სასამართლოს წევრ სახელმწიფოთა მე-18 ასამბლეაზე მონაწილეობის მისაღებად ჰააგაში გაემგზავრა.

ვიზიტის მთავარი მიზანია საქართველოს სახელით ჰააგის სასამართლოს წევრი სახელმწიფოების წინაშე განაცხადის შეტანა იმის შესახებ, რომ საქართველო 2020 წელს სისხლის სამართლის საერთაშორისო სასამართლოს მოსამართლეობის კანდიდატს წარადგენს.

კერძოდ, 2020 წლის დეკემბერში, ჰააგის სასამართლოს წევრ სახელმწიფოთა მე-19 ასამბლეის ფარგლებში, რომელშიც 123 სახელმწიფო მიიღებს მონაწილეობას, 6 ვაკანტურ ადგილზე მოსამართლეები სხვადასხვა რეგიონიდან აირჩევიან. მათ შორის, ერთი მოსამართლე აირჩევა აღმოსავლეთ ევროპიდან, რადგან ვადა ეწურება ამ რეგიონიდან არჩეულ ჩეხ მოსამართლეს.

საქართველო სწორედ ამ პოზიციაზე წარადგენს კანდიდატს, რომლის შესარჩევად ეროვნულ დონეზე ჩატარდება კონკურსი რომის სტატუტისა და ასამბლეის რეზოლუციის მოთხოვნების სრული დაცვით. საქართველოს გარდა, აღმოსავლეთ ევროპის ჯგუფიდან კანდიდატის დასახელება ალბანეთს, ბოსნიას, ბულგარეთს, ხორვატიას, ჩეხეთს, ესტონეთს, ლატვიას, ლიეტუვას, მონტენეგროს, ჩრდილოეთ მაკედონიას, მოლდოვას, რუმინეთს, სერბეთს, სლოვაკეთს და სლოვენიას შეუძლია.

ვიზიტის ფარგლებში, ვიცეპრემიერი შეხვედრებს გამართავს ჰააგის სასამართლოს ხელმძღვანელ თანამდებობის პირებთანაც. იუსტიციის სამინისტროს დელეგაციის შემადგენლობაში არიან იუსტიციის მინისტრის მოადგილე გოჩა ლორთქიფანიძე და იუსტიციის სამინისტროს საერთაშორისო სასამართლოებში სახელმწიფო წარმომადგენლობის დეპარტამენტის უფროსი ბექა ძამაშვილი.