4 თეატრში ხელმძღვანელების კანდიდატურები დასანიშნად წულუკიანს წარედგინა

4 თეატრში ხელმძღვანელების კანდიდატურები დასანიშნად წულუკიანს წარედგინა – ვინ არიან კანდიდატები!?

4 თეატრში ხელმძღვანელების კანდიდატურები დასანიშნად წულუკიანს წარედგინა

საქართველოს კულტურის, სპორტისა და ახალგაზრდობის სამინისტრის ინფორმაციით, სამინისტროს მმართველობის სფეროში მოქმედ 4 თეატრში სამხატვრო ხელმძღვანელების კანდიდატურები დასანიშნად მინისტრს წარედგინა:

– ნოდარ დუმბაძის სახელობის მოზარდ მაყურებელთა თეატრის სამხატვრო ხელმძღვანელად – დიმიტრი ხვთისიაშვილის;

– თბილისის პეტროს ადამიანის სახელობის სომხურ დრამატულ თეატრში – არმენაკ ბაიანდურიანის;

– მესხეთის (ახალციხის) პროფესიულ სახელმწიფო თეატრში – ნაზო სულუაშვილის;

– თელავის ვაჟა-ფშაველას სახელობის პროფესიულ სახელმწიფო დრამატულ თეატრში – პაატა გულიაშვილის კანდიდატურა.

ასევე, უწყების ცნობით, კულტურის სამინისტროს მიერ მიღებულ იქნა გადაწყვეტილება სსიპ ვასო აბაშიძის სახელობის მუსიკისა და დრამის თეატრში სამხატვრო ხელმძღვანელის პოზიციაზე დავით დოიაშვილის კანდიდატურის სარეკომენდაციო საბჭოს წინაშე განსახილველად წარდგენის შესახებ.

სამინისტროს განცხადებაში ასევე აღნიშნულია, რომ გიორგი ერისთავის სახელობის გორის სახელმწიფო დრამატული თეატრის სამხატვრო ხელმძღვანელის შერჩევის მიზნით კონკურსი ჩაშლილად გამოცხადდა, ამიტომ თეატრში ხელმძღვანელის პოზიციაზე კონკურსი დღეს ხელახლა ცხადდება.

როგორც ცნობილია, საქართველოს კულტურის, სპორტისა და ახალგაზრდობის სამინისტროს მმართველობის სფეროში მოქმედი თეატრებიდან, 21 თეატრის სამხატვრო ხელმძღვანელს უფლებამოსილების 4-წლიანი ვადა 2022 წლის 1 იანვარს ამოეწურა. აქედან გამომდინარე, 2021 წლის დეკემბრიდან, კულტურის სამინისტრომ სამხატვრო ხელმძღვანელების შესარჩევად კონკურსი უკვე 15 თეატრში გამოაცხადა.

სამინისტროს ინფორმაციით, მიმდინარე წლის 12 იანვარს, კონკურსის შედეგად, ალექსანდრე წუწუნავას სახელობის ოზურგეთის სახელმწიფო დრამატული თეატრის სამხატვრო ხელმძღვანელად ვასილ ჩიგოგიძე, ხოლო გიორგი მიქელაძის სახელობის თბილისის თოჯინების სახელმწიფო თეატრის ხელმძღვანელად ნიკოლოზ საბაშვილი დაინიშნენ. აღნიშნული პირები თეატრის ხელმძღვანელის პოზიციას „პროფესიული თეატრების შესახებ“ საქართველოს კანონის შესაბამისად, 4 წლის ვადით დაიკავებენ. ამასთან, კულტურის მინისტრმა, პროფესიული თეატრების შესახებ საქართველოს კანონის მეათე მუხლის მერვე პუნქტის „გ“ ქვეპუნქტის შესაბამისად, გამოიყენა დისკრეციული უფლება, საკუთარი შეხედულებისამებრ, უკონკურსოდ, დაენიშნა სამინისტროს მმართველობის სფეროში მოქმედი ოთხი თეატრის სამხატვრო ხელმძღვანელები: რეზო გაბრიაძის თეატრის სამხატვრო ხელმძღვანელად რეჟისორი და მსახიობი ლევან გაბრიაძე, ჩრდილების პროფესიული სახელმწიფო თეატრ „აფხაზეთის“ სამხატვრო ხელმძღვანელად რეჟისორი, მსახიობი და დრამატურგი გელა კანდელაკი, შოთა რუსთაველის სახელობის ეროვნული თეატრის სამხატვრო ხელმძღვანელად რობერტ სტურუა, ხოლო გრიბოედოვის თეატრის სამხატვრო ხელმძღვანელად ავთანდილ ვარსიმაშვილი დაინიშნენ.

წყარო: newposts.ge